ახალ ახალი ამბები რაც კი ჩვენ ქვეყანაში ხდება!!!

ეუთო-ს საგარეო საქმეთა მინისტრების შეხვედრა დღეს დაიწყება

admin — Thu, 04 Dec 2008 20:20:01 GMT

ფინეთში დღეს ეუთო-ს საგარეო საქმეთა მინისტრების მე-16 შეხვედრა დაიწყებს მუშაობას.

ამ დროისთვის ცნობილია, რომ სამიტს არ დაესწრება ამერიკის სახელმწიფო მდივანი კონდოლიზა რაისი, იგი ვიზიტით ინდოეთში იმყოფება.

ამერიკის დელეგაციას სამიტზე სახელმწიფო მდივნის წარმომადგენელი უხელმძღვანელებს. სამიტს დაესწრება 52 ქვეყნის საგარეო საქმეთა მინისტრი.
საქართველოს დელეგაციას საგარეო პოლიტიკური უწყების ხელმძღვანელი ეკა ტყეშელაშვილი თავმჯდომარეობს. მოგვიანებით გაირკვევა, გაიმართება თუ არა საქართველოსა და რუსეთის საგარეო სამქეთა მინისტრების ორმხრივი შეხვდრა.
ცნობილია, რომ სამიტზე ჩადის რუსეთის საგარეო საქმეთა მინისტრი სერგეი ლავროვი, მას ჰელსინკში დღეს ელოდებიან. დღესვე დაგეგმილია მინისტრების არაფორმალური სადილი, სადაც ლავროვი წარმოადგენს “პანევროპული უსაფრთხოების შესახებ” რუსეთის პრეზიდენტის მედვედევის ახალი ინიციატივის მთავარ ფორმულირებებს.

წინასწარი ინფორმაციით, სამიტზე ერთ-ერთი მთავარი განსახილველი საკითხი სწორედ ევროპული უსაფრთხოების პაქტი იქნება. ამის თაობაზე გუშინ ბრიუსლეში გამართულ შეხვედრაზე კონდოლიზა რაისმა და ეუთო-ს მოქმედმა თავმჯდომარემ, ფინეთის საგარეო საქმეთა მინისტრმა ალექსანდრ სტუბმა ისეუბრეს.

რაც შეეხება დღის წესრიგს, სამიტი დღეს, თბილისის დროით 12.00 საათზე გაიხსნება. სიტყვით გამოვლენ ფინეთის პრეზიდენტი ტარია ჰალონენი, ეუთო-ს მოქმედი თავმჯდომარე ალექსანდრ სტუბი და ეუთო-ს გენერალური მდივანი მარკ პერინ დე ბრიშამბო.

15.00 საათისთვის სამიტის პლენარულ სხდომაზე გაკეთდება დელეგაციების ხელმძღვანელების განცხადებები. სამიტი 5 დეკემბერს დაასრულებს მუშაობას.
სამიტის ფარგლებში დაგეგმილია ორმხრივი შეხვედრები, მათი განრიგი ზუსტდება.
ფინეთის თავმჯდომარეობით ეს არის ბოლო სამიტი. 31 დეკემბერს იწურება ეუთო-ში ფინეთის ვადა და ერთი წლით ორგანიზაციას საბერძნეთი უხელმღვანელებს.

რუსი უფლებადამცველები ევროკავშირს მოუწოდებენ

admin — Thu, 04 Dec 2008 20:19:43 GMT

რუსი უფლებადამცველბი ევროკავშირს მოუწოდებენ, რუსეთთან ურთიერთობაში აგვისტოს მოვლენები გაითვალისწინონ. ამის შესახებ გამოცემა „კავკაზსკი უზელი“ იუწყება.

მიმართვას რუსეთის ოცამდე წამყვანმა უფლებების დამცველმა ორგანიზაციამ მოაწერა ხელი.
მიმართვაში ნათქვამია, რომ რუსეთთან თანამშრომლობის ხელშეკრულების მომზადებისას ევროკავშირი ისე არ უნდა მოიქცეს, თითქოს სამხრეთ კავკასიაში ომი არ ყოფილა.

მათივე აზრით, აგვისტოს მოვლენების იგნორირება ახალი კრიზისებისთვის, ადამიანის უფლებების, საერთაშორისო და ჰუმანიტარული სამართლის დარღვევისთვის პირობების შექმნას ნიშნავს.

მიმართვაში აღნიშნულია, რომ სარკოზი-მედვედევის გეგმა სრულად არ არის შესრულებული, კერძოდ, რუსული ჯარები კონფლიქტამდელ პოზიციებზე არ დაბრუნებულან.

"ისე მოქცევით, თითქოს, ეს ასე არ არის, ევროკავშირი არათანმიმდევრულობას იჩენს, როგორც ომის პირველ დღეებში, როცა სააკაშვილის ქმედებებს ნათელ შეფასებას არ აძლევდა", - აცხადებენ რუსი უფლებადამცველები.

მიმართვის ავტორები აღნიშნავენ, რომ "აგვსიტოს მოვლენებამდე ჩეჩნეთში რუსეთის ხელისუფლების მოქმედებებზე, რუსეთში ადამიანის უფლებების დარღვევებზე ევროპის არაადეკვატურმა რეაქციამ, აფხაზეთსა და სამხრეთ ოსეთის კონფლიქტების მიმართ უყურადღებობამ მიგვიყვანა".

თავდაცვის სამინისტროში სამხედრო ატაშეთა ასოციაციასთან შეხვედრა გაიმართა

admin — Thu, 04 Dec 2008 20:19:17 GMT

თავდაცვის სამინისტროში დღეს საქართველოში აკრედიტებულ სამხედრო ატაშეთა ასოციაციათან შეხვედრა გაიმართა.

სტუმრები შეიარაღებული ძალების გაერთიანებული შტაბის უფროსმა, პოლკოვნიკმა ვლადიმერ ჩაჩიბაიამ მიიღო. ასოციაციის ახლადდანიშნულმა თავმჯდომარემ, აშშ-ის თავდაცვის ატაშემ, პოლკოვნიკმა მეთიუ ბრენდმა გაერთიანებული შტაბის უფროსს ასოციაციის შემადგენლობა პირადად წარუდგინა.

შეხვედრას ასევე სტრატეგიული დაგეგმვისა და სამხედრო პოლიტიკის დეპარტამენტის და ოპერატიული დაგეგმვის დეპარტამენტის უფროსები დაესწრნენ.

მხარეებმა შეხვედრისასა საქართველოს შეიარაღებული ძალების შესაძლებლობების განვითარებისა და რესტრუქტურიზაციის სამომავლო პერსპექტივებზე ისაუბრეს. პოლკოვნიკმა ბრენდმა ასოციაციის სახელით, ქართულ მხარეს თავდაცვის სფეროში მიმდინარე რეფორმების განხორციელებაში დახმარება აღუთქვა

ნინო ბურჯანაძე პოლონეთში გაემგზავრა

admin — Thu, 04 Dec 2008 20:18:45 GMT

საქართველოს პარლამენტის ყოფილი თავმჯდომარე, პოლიტიკური პარტიის ”დემოკრატიული მოძრაობა ერთიანი საქართველოსთვის” ლიდერი ნინო ბურჯანაძე ოფიციალური ვიზიტით პოლონეთში გაემგზავრა.

ნინო ბურჯანაძე შეხვედრებს პოლონეთის საგარეო საქმეთა მინისტრთან და სხვა ოფიციალურ პირებთან გამართავს.

მოძრაობის ლიდერი პოლონეთის პარლამენტის საგარეო ურთიერთობათა კომიტეტის სხდომას დაესწრება, რომელზეც მოხსენებით თემაზე ”საქართველოს კრიზისის შედეგები ევროკავშირისა და ნატოს აღმოსავლურ პოლიტიკაზე”გამოვა.

ნინო ბურჯანაძე საქართველოში 7 დეკემბერს დაბრუნდება.

უფასო სასადილოს დირექტორს საკვების მითვისებაში ადანაშაულებენ

admin — Thu, 04 Dec 2008 20:18:16 GMT

დედოფლისწყაროში მცხოვრები სოციალურად დაუცველები ”ნაციონალური მოძრაობის” მიერ ჩამოყალიბებული უფასო სასადილოს დირექტორს უყურადღებობასა და საკვების მითვისებაში ადანაშაულებენ.

როგორც სოციალურად დაუცველებმა კახეთის საინფორმაციო ცენტრს აცნობეს, სასადილო ადგილობრივი ბიუჯეტიდან ფინანსდება და გათვალისწინებული თანხებით ბენეფიციარებს კვირაში ორჯერ მაინც ხორციანი წვნიანით უნდა კვებავდნენ, არადა სასადილოს ხელმძღვანელობა მათ მხოლოდ ლობიოს და უხორცო წვნიანს აძლევს.

ერთ - ერთი სოციალურად დაუცველის თქმით, მან დახმარებისათვის დედოფლისწყაროს მუნიციპალიტეტის გამგეობას არაერთხელ მიმართა, მაგრამ უშედეგოდ. გამგეობაში სასადილოს ბენეფიციართა პრეტენზიებით არ დაინტერესდნენ.

ამის მიზეზად სოციალურად დაუცველები იმას ასახელებენ, რომ სასადილოს ხელმძღვანელი ფიქრია წიკლაური, დედოფლისწყაროს რაიონის გამგებლის პირველი მოადგილის გელა თეთრაულის მეუღლეა.

სოციალურად დაუცველები ვინაობის საჯაროდ გამჟღავნებისგან თავს იკავებენ, რადგან არ გამორიცხავენ, რომ სასადილოს ხელმძღვანელმა მუქარა სისრულეში მოიყვანოს და მომჩივანი ბენეფიციარები ულუკმაპუროდ დარჩნენ.

უფასო სასადილოს ხელმძღვანელი ფიქრია წიკლაური სოციალურად დაუცველების ბრალდებებთან დაკავშირებით კომენტარს არ აკეთებს. ამ საკითხზე კომენტარი არც დედოფლისწყაროს გამგებელმა ლევან ბაღაშვილმა გააკეთა.

ბოგანოთა და მოსულელოთა შოუმენი

admin — Thu, 04 Dec 2008 20:17:47 GMT

რუსული პუბლიკის დიდი ნაწილი დღეს განსაკუთრებით აჟიტირებულ იყო ”მამა- მარჩენალისგან” სწორედ იმ პასუხების მოსმენით, რაც მათ ფსიქიკას ზუსტად მიესადაგებოდა. ვლადიმერ პუტინმა ამჯერად, რიგით, თუ არ ვცდები, მე-7 გასაუბრება მოაწყო საკუთარ ამომრჩეველთან, თუმცა მსგავსი ტელეხიდი პრემიერის რანგში წელს პირველი იყო.

ვიღაცეები შეშას ითხოვდნენ, ვიღაცეები სიყვარულს, ხოლო შედარებით ”ინტელექტუალები” მსოფლიო ეკონომიკურ კრიზისს და მის გავლენას რუსეთზე და რუსეთ-საქართველოს პოლიტიკასაც გადასწვდნენ. სამსაათიანი კითხვა-პასუხის რეჟიმში, პუტინმა 2,2 მილიონი რუსეთის მოქალაქის 1,5 მილიონი ზარიდან და 600 ათასი SMS-დან, 70-მდე კითხვას უპასუხა და ბოლომდე ითამაშა ”კეთილი მეფის” როლი.

ამ კითხვა-პასუხში ერთადერთი, რაც, შესაძლოა, მეტ-ნაკლებად, საინტერესოდ გამოიყურებოდეს პუტინის ის განცხადება იყო, სადაც მან კატეგორიულად გამორიცხა 2012 წლამდე საპრეზიდენტო პოსტზე დაბრუნების შესაძლებლობა.ვნახოთ, მაგრამ ამჯერად, პუტინი, როგორც თავად აცხადებს, ”მთავრობის გადაყენების მიზეზს ვერ ხედავს”.

კიდევ უფრო საინტერესო იყო მისი პასუხი საქართველოსთან მიმართებაში, სადაც ამ უკანასკნელმა მკაფიოდ აღნიშნა, რომ რუსეთი აფხაზეთიდან და სამხრეთ ოსეთიდან გასვლას არ აპირებს.

- ”სააკაშვილმა სამხრეთ ოსეთში სისხლის აბანოები მოაწყო. რაც შეეხება აგვისტოს მოვლენების დროს რუსეთის მხარდაჭერას, ეს იმ ხელშეკრულებით იყო გათვალისწინებული, რომელიც რუსეთს აფხაზეთსა და სამხრეთ ოსეთთან აქვს დადებული. ეს აგრესია რომ არ მომხდარიყო, რუსეთი ალბათ, მართლაც არ დაიშურებდა ძალისხმევას, რომ საქართველოს ტერიტორიული მთლიანობის აღსადგენად ყველანაირი პირობა შეექმნა, მაგრამ ამ აგრესიის შემდეგ ნათელი გახდა, რომ ეს შეუძლებელია. მიღებული გადაწყვეტილება კი ამ რეგიონში მომავალი სისხლისღვრის ასაცილებლად იყო საჭირო”, - ბრძანა ჩვენი დროის ”გმირმა”.

ახლა კი პუტინი იმედოვნებს, რომ ”საქართველოს საზოგადოება თვითონ მიიღებს გადაწყვეტილებას, როგორი პასუხისმგებლობა დააკისროს მთავრობას, რომელმაც ქვეყანა ასეთ სავალალო მდგომარეობამდე მიიყვანა”.

ომის დაწყებამდე რამდენიმე დღით ადრე ფრანგ ჟურნალისტებთან გახმოვანებული მუქარა - ”სააკაშვილს ერთი ადგილით ჩამოვკიდებ”, - როგორც ჩანს, სიბრაზით ნასროლი ფრაზა სულაც არ ყოფილა. პუტინს დღემდე ბოღმა ახრჩობს ”ლილიპუტინის” და ”ფეკალიების” გახსენებაზე და, როცა ერთ-ერთმა ჟურნალისტმა იკითხა: ”მართალია თუ არა, რომ მიხეილ სააკაშვილს ერთი ადგილით ჩამოკიდებით ემუქრებოდა”. პუტინმა უპასუხა: ”რატომ მხოლოდ ერთით?!”

ჩვენს ”მკვდარს” თავად მივხედავთ, მაგრამ დროა პუტინმა თავის ”ერთ ადგილს” მიხედოს, რომ რუსმა ოლიგარქებმა სწორედ იგი არ ჩამოკიდონ ”ერთი ადგილით.” მისი წყალობით, რუსეთმა უზარმაზარი ეკონომიკური ზარალი ნახა და საეჭვოა ფულის საზოგადოებამ მას ეს ადვილად აპატიოს.

პუტინის დღევანდელი პასუხები, სასიამოვნო ნამდვილად არ ყოფლა, მაგრამ, კაცმა რომ თქვას, არც ყურადღების ღირსად უნდა ჩაითვალოს. პოლიტოლოგი სოსო ცინცაძე თვლის, რომ ეს განცხადებები რუსეთის ყველაზე დაბეჩავებული, ბოგანო და მოსულელო საზოგადოებისთვის იყო განკუთვნილი.

- ”რუსეთმა ზომიერების გრძნობა დიდი ხანია დაკარგა, მაგრამ პუტინს ისეთი სკოლა აქვს გავლილი - ”კეთილშობილ ქალთა გიმნაზია”, რომ ზომიერების გრძნობაზე საუბარი ზედმეტია. თქვენ რა გგონიათ, პუტინი დასავლეთსაც ამ ტონით ელაპარაკება? დარწმუნებული ვარ, როდესაც პუტინი შროდერს და მერკელს ელაპარაკებოდა, ისევე უპასუხებდა, როგორც თავის დროზე, რუსეთის მეფეები პასუხობდნენ ევროპელებს. ნიკოლოზ პირველი და ეკატერინეც ამბობდა, რომ რუსეთის მოსახლეობას ასეთ ტონში მოსწონდა ლაპარაკი, რა ვქნათ, ასეთია ჩემი ხალხიო. ასე იყო სტალინი და ასეა პუტინიც. აქ გასაკვირი არაფერია”, - ამბობს სოსო ცინცაძე.

სხვათა შორის, რუსეთის ინტელექტუალური საზოგადოების პოტენციალები ყოველთვის პოლარიზებული იყო და სწორედ ეს იყო რუსეთის ტრაგედია. რუსეთში ყოველთვის ცოტანი იყვნენ ჩერნიშევსკები, დოსტოევსკები, ტოლსტოები და ძალიან ბევრი იყო კატკოვები და სლავიანოფილები.

რუსეთში ახლაც, ცოტაა რუსეთის მემარჯვენე პოლიტიკური ძალები, მას ყოველთვის ყავდა და ეყოლება სოლცენიჟინი, ლიხაჩოვი და მათი მსგავსი ადამიანები, მაგრამ რუსეთში უზარმაზარი არმიაა იმ მასისა, რომელიც ყველაფრის წამლეკავი და უარმყოფელია.

პუტინის ამომრჩევლების უდიდესი მასაც სწორედ ეს ხალხია და ამიტომ, პუტინიც დღეს მათ ელაპარაკებოდა. აქ კიდევ ერთი დეტალია საყურადღებო, როცა პუტინი საკუთარ ელექტორატს ელაპარაკება, ძალას არ იშურებს, რომ მედვედევი არ დაამციროს.

- ”პუტინი შიშობს - ღმერთმა ნუ ქნას, მედვედევმა დაიჯეროს, რომ პრეზიდენტია. ომის დროსაც, მთავარსარდალი მედვედევი იყო, მაგრამ პუტინი თავად ხელმძღვანელობდა პროცესებს. თავპირისმტვრევით ჩამოვარდა პეკინიდან ვლადიკავკაზში და სიტყვა არ აცალა მედვედევს. გასაოცარი ისაა, რომ მედვედევს, ან ღირსება არ აქვს, ან?.. როგორც ჩანს, პუტინს ლაგამი კარგად აქვს ამოდებული მისთვის, ან ისეთი შეთანხმება არსებობს, რომლის უკანაც ძალა დგას პუტინის ხელში”, - ასკვნის სოსო ცინცაძე.

ეს ვითარება კიდევ ერთხელ გვაფიქრებინებს, რომ რუსეთში საბჭოთა კავშირი ბრუნდება. პუტინი რუს ხალხს ყოველდღიურად ახსენებს მმართველი პარტიის ძლევამოსილებას. საბჭოთა კავშირის დროს, პრეზიდიუმის თავმჯდომარე სხვა არაფერი იყო, თუ არა პრეზდენტი, მაგრამ გენერალურ მდივანთან შედარებით, იგი თითქმის არაფეს წარმოადგენდა. ახლაც, პრეზიდენტი მედვედევი აბსოლუტური ნოლია და რუსეთში პრემიერი პუტინი წყვეტს ყველაფერს.

რაც შეეხება დღევანდელ დღეს, ესეც ჩვეულებრივი მოვლენაა პოსტსაბჭოთა რესპუბლიკებისთვის. ჟურნალისტებისთვის და არა მხოლოდ მათთვის, კითხვებს პრეზიდენტის ადმინისტრაცია ამზადებს და პასუხებიც ამის მიხედვით მზადდება. ეს პროცესი არც საქართველოსთვისაა უცხო, რაშიც ჩვენი კოლეგები, ხმამაღლა თუ არა, გულში მაინც დაგვეთანხმებიან.

სააკაშვილი ზოგჯერ ისეთ რამეს წამოროშავს, ინფარქტს აგკიდებს, მაგრამ უსაგნოდ რომ არ ილაპარაკოს, შიგადაშიგ, კითხვების ჩასმის აუცილებლობა დგება. ასე იყო პუტინის შემთხვევაშიც, მაგრამ განსხვავება ისაა, რომ ქართულ საზოგადოებას სააკაშვილი კერპად არ ჰყავს და არც პუტინივით ”აბოლებინებს” თავს. რუსეთში კი ეს მოსწონთ და სულგანაბული უსმენენ თავიანთ ლიდერს. ესაა და ეს.

სოსო ცინცაძე ამბობს, რომ პუტინმა ეს შოუ ძალზედ პრაგმატული და პრაქტიკული მოსაზრებებით დადგა. ამავედროს ძალზედ ჭკვიანურად. პოლიტოლოგი იმაშიც დარწმუნებულია, რომ ხვალიდან მისი რეიტინგი, რომელიც 90%-ის ფარგლებში მერყეობს რამდენიმე პუნქტით მოიმატებს.

- ”პუტინმა შესანისნავად იცის რომ ცირკს აწყობს და სხვა ბევრისგან განსხვავებით, იცის თუ რატომ აწყობს. ცირკს ყოველთვის უკუეფექტი მოყვება, მაგრამ პუტინის ცირკს პრაგმატული ეფექტი ახლავს და სწორედ ეს არის განსხავება”.

როცა ქვეყანაში პოლიტიკა მეფობს, ეს ქვეყანა ეკონომიკურ კრიზისამდე აუცილებლად მივა

admin — Thu, 23 Oct 2008 12:51:06 GMT

რამდენჯერაც წავიდნენ პოლიტიკიდან, იმდენჯერვე უკან დაბრუნდნენ, მხოლოდ - ახალ ამპლუაში. ძალაუფლების ტკბობით ცდუნება იმდენად დიდია, რომ წასულები ამჯერადაც მოსასვლელად ემზადებიან. თითოეული მათგანი ქვეყნის სიყვარულში ისე გეჯიბრება, ეჭვი გეპარება: იქნებ შენ იჩუქე მილიონიანი აგარაკი ერთ ლარად… იქნებ, შენ ჩაახუტე ქართული ენერგეტიკა რუსებს… ან, იქნებ, შენი მმართველობის დროს ატერორებდა პროკურატურა ბიზნესს…

ისეთი განცდა გეუფლება, მოსახლეობა ამნეზიით დაავადდა, ან ისეა გაბითურებული, რომ პასუხს არც წამსვლელს სთხოვს და არც მომსვლელის მიზანს კითხულობს. ყოველი მომსვლელი დროდადრო ლოზუნგებს ცვლის, მაგრამ საბოლოოდ, ქართულ პოლიტიკურ პროტესტს ერთი სახელი აქვს - ყველა ერთის წინააღმდეგ.

ერთ დროს ყველანი ერთად, შევარდნაძესთან სინქრონულად მოქმედებდნენ და ქვეყანაში გამეფებულ კორუფციაზე ხმას არ იღებდნენ. მას შემდეგ, რაც მოძლიერდნენ, მეტი მოინდომეს და ”მოქალაქეთა კავშირს” გამოეყვნენ. თანდათან დაიწყეს თავიანთი პროტესტის გამოხატვა და ბოლოს, შევარდაძესთან დაპირისპირებით (რაშიც დასავლეთის მხარდაჭერა მიიღეს), ძალაუფლება ხელში აიღეს.

მაშინ საზოგადოება მათ უპირობოდ გაყვა, რადგან მათ ჰქონდათ ძალა, რომელმაც ხალხში რწმენა გააჩინა. მაშინ, ”ვარდების რევოლუციის” გარიჟრაჟზე, ყველანი ერთად იდგნენ - ჟვანია, სააკაშვილი, ბურჯანაძე, ოქრუაშვილი, ნოღაიდელი და მათ მზეს ეფიცხებოდა კიწმარიშვილი. დღეს ყველა მათგანი სააკაშვილს დაუპირისპირდა, რადგან ის ”ერთი” ახლა განსაცდელშია და პოლიტიკაში დღეებს უთვლიან.

ერთი ხელისუფლება, სამი ოპოზიცია და სამი ამომრჩეველი
ოპოზიციის სურვილის მიუხედავად, სააკაშვილი, ჯერჯერობით, არსად წასვლას არ ჩქარობს და ამდენად, გამომშვიდობაზე საუბარი სასაცილოა. თუმცა, 7 ნოემბრის შემდეგ გამოჩნდება ვინ, როგორ და სად წავა. მანამდე ოპოზიციის ლიდერები თათბირობენ და ერთმანეთთან ურთიერთობას არკვევენ.

რა შანსები აქვს დღეს ოპოზიციას, ძნელი სათქმელია. რამაზ საყვარელიძე ამბობს, რომ მათი შანსები მოსახლეობის პოლიტიკურ მენტალიტეტზე იქნება დამოკიდებული.

-”პარტიები პოლიტიკური სტილის მიხედვით გაერთიანდებიან. ბურჯანაძე უფრო ზომიერი პოლიტიკის მომხრეა, ანალოგიური სტილი აქვთ ”რესპუბლიკელებს” და ”მემარჯვენეებს”. ამიტომ, ვფიქრობ, რომ ეს სტილი მათ დააახლოებს”.

- ”რაც შეეხება ნოღაიდელს, ალბათ, იგი ისეთ პოლიტიკურ გარემოს მოძებნის, სადაც ეკონომიკური საკითხები წინა პლანზე იქნება წამოწეული. თუმცა, დღეს ძნელია ქართულ პოლიტიკურ სივრცეში მოინახოს პარტია, რომელსაც ეკონომიკური საკითხები წინა პლანზე აქვს გამოტანილი”.

ნოღაიდელმა ეულად რომ არ იგრძნოს თავი, მას ბურჯანაძესთან გაერთიანებასაც უწინასწარმეტყველებენ. ბოლოს და ბოლოს, ეს ის ხალხია, რომელთათვის სააკაშვილი მას შემდეგ გახდა მიუღებელი, რაც თავად დაკარგეს ”ხელმწიფის კარზე” გავლენა. ამასთან, საერთო ინტერესები და საერთო წარსული აქვთ.

თუმცა, პოლიტიკურ კულუარებში იმის შესახებაც აქტიურად საუბრობენ, რომ მმართველ ძალას კიდევ რამდენიმე პერსონა დააკლდება და ისინიც ოპოზიციაში გადაბარგდებიან. შესაძლოა, ისინიც ბურჯანაძის გუნდში ვიხილოთ.

ამ ეტაპზე, პოტენციურ ოპოზიციონერებად გიორგი ბარამიძე და ძმები - გელა და დავით ბეჟუაშვილები სახელდებიან. როგორც ამბობენ, ეს სია ამით არ ამოიწურება, მაგრამ ვნახოთ - ჯერჯერობით, რამის მტკიცება შეუძლებელია. თუ სააკაშვილის სავარძელი ძლიერ შეირყა, შესაძლოა, ოპოზიციაში ”ნაციონალებიდან” კიდევ ბევრი გადაბარგდეს.

განვლილმა წლებმა დაგვარწმუნა, რომ ადამიანების დიდი ნაწილი, გაოპოზიციონერებულ ხელისუფლებას არც შეცდომებს უხსენებს და ხშირად, ბელადადაც აღიარებენ. ბურჯანაძის და ნოღაიდელის ბელადობა უფრო ფანტაზიის სფეროს განეკუთვნება, მაგრამ რაც შეეხება ოქრუაშვილს, გამორიცხული არაფერია, მითუმეტეს, რომ ოპოზიციაც თითქმის გაკოტრებულია და ლიდერიც კი არ ყავს.

ქართულ საზოგადოებას კი, რატომღაც, ლიდერების მიმართ განსაკუთრებული დამოკიდებულება აქვს და ბელადომანიას ჯერაც ვერ მორევია. რამაზ საყვარელიძე ქართულ პოლიტიკას გუნდს ადარებს, სადაც სოლისტი განსაკუთრებული ყურადღების ცენტრშია.

- ”მოსახლეობის ნაწილი ”სოლისტებზე” უფროა ორიენტირებული, ვიდრე გუნდურ შესრულებაზე. ამიტომ, თუ კონკრეტულ ლიდერზე ვიქნებით ორიენტირებული და ჩავთვლით, რომ ქართულ პოლიტიკურ სპექტრში ასეთი არავინ გვეგულება, ხელის ჩაქნევა მოგვიწევს. გუნდის მომღერალი სოლისტის დონის მომღერალი ვერ იქნება, მაგრამ გუნდურ სიმღერასაც თავისი ფუნქცია აქვს”, - ამბობს რამაზ საყვარელიძე.

ამ გუნდში პირველ ადგილს ნოემბრის მოვლენებში მონაწილე ოპოზიცია იკავებს, პარლამენტში შესულების გამოკლებით. ისინი გაერთიანებას ალბათ, ვერ მოახერხებენ და ამის არც საჭიროება არსებობს, მაგრამ 7 ნოემბერს, ხელისუფლების წინააღმდეგ პროტესტის ერთად გამოხატვას გეგმავენ. შეძლებენ თუ არა ქუჩაში მრავალრიცხოვანი მოსახლეობის გამოყვანას, ეს იმაზეა დამოკიდებული, ხალხს რამდენად დაარწმუნებენ თავიანთ ქმედითუნარიანობაში.

პარლამენტში შესული ოპოზიცია კი უკვე აღარ განიხილება ოპოზიციად და ეჭვი არავის ეპარება, რომ ისინი ხელისუფლების გუნდში დაიმკვიდრებენ ადგილს. თუმცა, მომხრეების შემოკრებას ისინიც შეძლებენ და ეს იქნება ის კატეგორია, რომელიც დღემდე ”ნაციონალების” მზეს ფიცულობს.

პოლიტიკურად განუვითარებლების გამოყენების თეორია
რატომ შედის ხალხი ერთა იგივე წყალში ორჯერ, რთული სათქმელია. რამაზ საყვარელიძე ამბობს, რომ ხელისუფლებაში მყოფ ადამიანს ყოველთვის, ძალის ნიშანი ახლავს. ამიტომ, იმის მიუხედავად, რომ თავადაც იგივეს ამბობს, რასაც სხვა ოპოზიციონერი, უფრო სწრაფად იკრეფს რეიტინგს. ვნახოთ, რამდენად მაღალი იქნება ბურჯანაძის, ნოღაიდელის და ოქრუაშვილის რეიტინგები.

-”ხალხი ემოციებით მოქმედებს - როცა ცხელა სიგრილეს ნატრობს, ხოლო როცა ცივა სითბო ენატრება. ხალხს რაც იმ წუთას აწუხებს, უნდა, რომ ის პრობლემები მოაგვაროს და ზოგადი თეორიებით არ ხელმძღვანელობს. როცა ქვეყანაში კორუფცია იყო გამეფებული, მაშინ სააკაშვილ-ჟვანიას გუნდის პოზიციები იყო წამყვანი და, როგორი უნდა ყოფილიყო ამ გუნდის მომავალი არავინ დაფიქრებულა,” - ასე აფასებს ფსიქოლოგი რამაზ საყვარელიძე ერის ფსიქიკას.

როგორც ჩანს, ახლაც ასე იქნება. მითუმეტეს, რომ დღესაც ბევრი რამ აწუხებს ხალხს - საკუთრების თემა, დაკარგული ტერიტორიები, სამართლიანობის პრობლემა, უმუშევრობა და ეკონომიკური სიდუხჭირე. ხალხი ამ ყველაფერს ხელისუფლებას აბრალებს და ხსნას ოპოზიციაში ხედავს. თუმცა, რა იქნება მომავალში ახლაც არავინ ფიქრობს.

ხალხი ხელისუფლებას და ოპოზიციასაც ყოველთვის გამოყენების მიზნით უყურებს და ალბათ, ასეც უნდა იყოს. თუმცა, ზოგჯერ, პრაგმატულობას ემოციები სჭარბობს და ხალხის სიყვარული ფანატიზმამდეც მიდის, რაც ქვეყნისთვის ყოველთვის საბედისწეროდ მთავრდება.

როგორც ექსპერტები ამბობენ, ამის მიზეზი საქართველოში პოლიტიკური კულტურის არარსებობაა და მისი ზრდის დიდი იმედიც არ უნდა გვქონდეს.

– ”როცა ხალხი დემოკრატიულ სისტემას ეჩვევა, სისტემის გასამყარებლად იცის რა მანევრი უნდა გააკეთოს. მაგალითად, ამერიკელი ამომრჩეველი პრეზიდენტს ერთი პარტიიდან ირჩევს, ხოლო პარლამენტს - მეორედან. თუმცა, ყოველთვის ასეც არ გამოსდის და ამიტომ, დღეს ამერიკელები თავიანთ თავს საყვედურებენ, რომ ეს ბალანსი არ დაიცვეს”, - ამბობს რამაზ საყვარელიძე.

ქართულ პოლიტიკაში კი, ამომრჩევლების ნაწილი დღემდე ფულზე იყიდება. ფული კი ყოველთვის სახელისუფლებო პარტიისა და მისია პრეზიდენტიც და პარლამენტიც. საზოგადოების მაღალი პოლიტიკური კულტურა დასავლეთში პარტიებს აიძულებს პროგრამების ინტელექტუალური მხარე მუდმივად მოწესრიგებული ჰქონდეთ. საქართველოში კი პარტიებს ამას არავინ სთხოვს და ისინიც კონცეფციებზე ფიქრით ზედმეტად თავს არ იწუხებენ.

ყველა ხელისუფლების დროს პარტიები ისე მოდიოდნენ, რომ მათთვის არავის უკითხავს კონცეფცია და, ძირითადად, ლოზუნგებით შემოიფარგლებონენ. ზვიადის დროს ლოზუნგი იყო: ”თავისუფალი საქართველო”. შევარდნაძეს დროს -”სტაბილურობა”, სააკაშვილის ძირითადი მოთხოვნა კი - ”ძირს შევარდნაძე”. მაშინ ეს ლოზუნგები მართავდა სიტუაციას.

ოპოზიციის დღევანდელი ლოზუნგიც გაჭრილი ვაშლივით ჰგავს სააკაშვილის ლოზუნგს, იმ მცირეოდენი განსხვავებით, რომ დღევანდელი ოპოზიცია, ნაკლებად რადიკალურია და სააკაშვილის ძირს ჩამოგდებას არჩევნების გზით გეგმავს.

სააკაშვილის დაღმართი
სააკაშვილის ხელისუფლებიდან ჩამოცილება კი იგეგმება, მაგრამ საყვარელიძე თვლის, რომ თავად სააკაშვილი არ არის ის ფიგურა, რომლის ხელისუფლებიდან ჩამოცილება მარტივად შეიძლება.
- ”იგი ბრწყინვალე პოლიტიკური მებრძოლი და პოლიტიკური ინტუიცის მქონე პიროვნებაა”.

ამას თუ დავუმატებთ ავანტიურას, რომელიც, კარგი თუ ცუდი გაგებით, პოლიტიკოსის ერთ-ერთი დამახასიათებელი თვისებაა, უნდა ვივარაუდოთ, რომ ოპოზიცია ძველებულრი მეთოდებით მასთან გამკლავებას ვერ შეძლებს.

თუ ოპოზიცია უფრო გააქტიურდება, შესაძლოა პროცესები უმართავიც გახდეს და არც ისაა გამორიცხული, რომ ამან ქვეყანა კვლავ კრიზისამდე მიიყვანოს. თუმცა, საყვარელიძე კრიზისებსაც კატეგორიებად ყოფს და ამბობს, რომ საქართველო დიდი ხანია ეკონომიკური კრიზისის პირისპირ დგას.

ექსპერტის აზრით, თუ გამოსვლებს და მიტინგებს პოლიტიკურ კრიზისად შევაფასებთ, იგი რა თქმა უნდა, აუცილებლად გაჩნდება. თუმცა, პოლიტიკურ კრიზისად მიიჩნევა მდგომარეობა, როცა ქვეყანაში პოლიტიკური ძალები ისე იყოფა, რომ გადაწყვეტილებას ვერ იღებენ. ასეთი კრიზისი კი ამ ხელისუფლებას ჯერჯერობით არ უდგას.

- ”მაგრამ როცა ქვეყანაში პოლიტიკა მეფობს ეკონომიკაზე და თანაც ამ ხარისხით, ადრე თუ გვიან, იგი აუცილებლად, ეკონომიკურ კრიზისამდე მივა”.

სააკაშვილის ხელისუფლებისთვის კი ეს ვერაფერი შეღავათია, რადგან სწორედ ეკონომიკური კრიზისი მიიყვანს მას სრულ პოლიტიკურ მარცხამდეც. როდის მოხდება ეს, ძნელი სათქმელია, მაგრამ ფაქტია, რომ მოხდება, რადგან ხელისუფლებამ ვერც საკუთარ შეცდომებზე ისწავლა ჭკუა და სხვისაზე - მითუმეტეს.

მარადონა თბილისშია

admin — Thu, 23 Oct 2008 12:50:24 GMT

გუშინ საღამოს, თბილისის დროით 21.45 საათზე, თბილისის საერთაშორისო აეროპორტში დაეშვა “თბილისი-ამსტერდამის” რეისი, რომლითაც საქართველოში დიეგო მარადონა მეგობრებთან ერთად ჩამოფრინდა.

დიეგო მარადონა 20 წუთის განმავლობაში ავტოგრაფებს არიგებდა, რის შემდეგაც მან აეროპორტი უკომენტაროდ დატოვა. მარადონა და მისი მეგობრები სასტუმრო “შერატონ მეტეხი პალასში” დაბინავდნენ.

მსოფლიო ფეხბურთის ლეგენდა, არგენტინელი დიეგო არმანდო მარადონა, თავისი “მეგობრების გუნდით”, 25 ოქტომბერს ბორის პაიჭაძის სახელობის ეროვნულ სტადიონზე “მეგობრობის თასისთვის” საქართველოს ვეტერანთა ნაკრებს დაუპირისპირდება.

მარადონა საქართველოს დედაქალაქს მეგობრების 16-კაციანი შემადგენლობით ესტუმრა. ესენი არიან: სერხიო გოიკოეჩეა, ფერნანდო კასერესი, ლუის მედერო, დიეგო სონორა, ალეხანდრო მანკუსო, ექტორ ალნეიდა, ალბერტო აკოსტა, ხუან ბორელი, ლეონარდო რუისი, მარსელო გომესი, გაბრიელ ამატო, ალბერტო კარანსა და ხოსე ფლორესი.

ცხინვალის რეგიონში რუსი სამხედროების რაოდენობა 7000 კაცს აღწევს

admin — Thu, 23 Oct 2008 12:49:58 GMT

ცხინვალის რეგიონში ბოლო ერთი კვირის განმავლობაში რუსი სამხედროების რაოდენობა 2000-ით გაიზარდა.

ამის შესახებ დღეს გამართულ პრესკონფერენციაზე შინაგან საქმეთა სამინისტროს ანალიტიკური დეპარტამენტის უფროსმა, შოთა უტიაშვილმა განაცხადა.

მისივე თქმით, დამატებით 2000 ჯარისკაცი ჯავის რაიონის ტერიტორიაზეა განლაგებული.

“ორი დღის წინ კი, 40 ერთეული მძიმე ტექნიკა ცხინვალიდან ახალგორის რაიონში გადაადგილდა. ტექნიკას თან ახლდა რამდენიმე ასეული ჯარისკაცი. ამგვარად, რუსების რაოდენობა ცხინვალის რეგიონში 7000 კაცს აღწევს, რაც მიგვაჩნია, რომ შემაშფოთებელია”, - განაცხადა შოთა უტიაშვილმა.

მანვე აღნიშნა, რომ ბოლო დროს რამდენიმე პროვოკაციული აქტიც განხორციელდა. კერძოდ, იყო ქართველი პოლიციელების პოსტის აფეთქების მცდელობა.

“ეს ყოველივე გვაძლევს ვარაუდის საფუძველს, რომ რუსული მხარე ვითარების ესკალაციას ამზადებს”, - განაცხადა შოთა უტიაშვილმა.

“საქართველოს შინაგან საქმეთა სამინისტროს განცხადება იმის შესახებ, რომ კონფლიქტის ზონაში რუსი სამხედროების ოდენობა გაიზარდა, რეალობას არ შეესაბამება”,- განცხადება ამის შესახებ სერგეი ლავროვმა გააკეთა.

რუსეთის საგარეო საქმეთა მინისტრმა ამ საკითხზე მოსკოვში გამართულ პრესკონფერენციაზე ისაუბრა.

“რთულია კომენტარის გაკეთება საქართველოს ხელისუფლების წარმომადგენლების განცხადებებზე. მათში ძალიან ცოტა სიმართლეა. ცრუ ინფორმაციის გავრცელების მეთოდს კი უკანასკნელ პერიოდში რეგულარულად მიმართავენ”,- განაცხადა ლავროვმა.

საქართველოს შინაგან საქმეთა სამინისტროს მიერ გავრცელებულ ინფორმაციას ტყუილსა და პროვოკაციას უწოდებენ რუსი დეპუტატებიც.

სერგეი მარკოვი მიიჩნევს, რომ რეგიონში არა სამხედრო ძალების დამატება, არამედ როტაცია ხდება. დუმა-ში აცხადებენ, რომ საქართველო ვერ ეგუება იმ აზრს, რომ სამხრეთ ოსეთი უკვე აღიარებული დამოუკიდებელი რესპუბლიკაა და სწორედ ამიტომ ქართული მხარე პროვოკაციებზე თავად მიდის.

რუსეთისგან მისალოდნელ აგრესიასთან დაკავშირებით პარლამენტი საერთაშორისო თანამეგობრობას განცხადებით გააფრთხილებს

admin — Thu, 23 Oct 2008 12:49:45 GMT

რუსეთისგან მისალოდნელ ახალ აგრესიასთან დაკავშირებით პარლამენტი საერთაშორისო თანამეგობრობას სპეციალური განცხადებით გააფრთხილებს.

საგარეო ურთიერთობათა და ევროინტეგრაციის საპარლამენტო კომიტეტების მიმართვის შემდეგ, პარლამენტი დღეს განცხადებასაც შეიმუშავებს.

განცხადების ტექსტზე პარლამენტის თავმჯდომარე დავით ბაქარაძესთან აღნიშნული კომიტეტები, თავდაცვისა და უშიშროების კომიტეტი და ანტიკრიზისული საბჭოს თავმჯდომარე გია თორთლაძე კონსულტაციებს დღესვე გამართავენ.

განცხადების შემუშავების მიზეზი ახალგორსა და ცხინვალში ვითარების დაძაბვა გახდა.

როგორც თავდაცვისა და უშიშროების კომიტეტის თავმჯდომარე გივი თარგამაძემ პარლამენტის დღევანდელ პლენარულ სხდომაზე განაცხადა, 21 ოქტომბერს ახალგორში 40 ერთეული ჯავშანტექნიკა იქნა შეყვანილი, გუშინწინ კი, მთელი კონფლიქტის ზონის ტერიტორიაზე ტექნიკის ინტესიური გადაადგილება მიმდინარეობდა, რასაც რუსეთის არმიის ხელმძღვანელობა სწავლებას უწოდებს.

ამასთან, გუშინ ცხინვალში დამატებით 2 ათასი სამხედრო მოსამსახურე შევიდა.

ამას გარდა, თარგამაძემ მოითხოვა, პარლამენტმა სთხოვოს საგარეო საქმეთა მინისტრს ეკა ტყეშელაშვილს, მიმართოს ფრანგ კოლეგას ბერნარდ კუშნერს, რათა მან მოიპოვიოს რუსი კოლეგებისგან პასუხი კონფლიქტის ზონაში არსებულ ვითარებაზე.

სიტუაციის დაძაბვასთან დაკავშირებით თარგამაძეს დაეთანხმა ვიცე-სპიკერი მიხეილ მაჭავარიანიც და განაცხადა, რომ აგრესორები გამომწვევად იქცევიან და როგორც ჩანს, მზადდება ახალი პროვოკაციები, არსებობს ამის ყველა სიმპტომი.

მაჭავარიანის თქმით, გაზრდილი შეიარაღება რუსეთს პროვოკაციებისთვის სჭირდება და აგვისტოს გაკვეთილებიდან გამომდინარე, განგაში წინასწარ არის ასატეხი.