გაერო-ში აშშ-ის დელეგაცია რუსეთისგან უპასუხო კითხვებზე პასუხის გაცემას ითხოვს.
“უშიშროების საბჭოს გუშინდელ სხდომაზე კვლავ კატეგორიულად მოვითხოვეთ რუსეთისგან პასუხი კითხვაზე, რატომ აგრძელებს რუსული მხარე საქართველოს ტერიოტორიაზე სამხედრო ოპერაციებს მაშინ, როდესაც საქართველომ ცეცხლის შეწყვეტის თაობაზე შეთანხმებას მოაწერა ხელი და რატომ სცდება რუსეთის მანევრები კონფლიქტის ზონებს, თუ მოსკოვის განცხადებები იმის შესახებ, რომ ის სამშვიდობო ოპერაციას ატარებს, სიმართლეს შეესაბამება” – განუცხადა ჟურნალისტებს გაერო-ში აშშ-ის მუდმივმა წარმომადგენელმა.
მისივე თქმით, “რუსული მხარე ასევე ვალდებულია, უპასუხოს კითხვას, რატომ ხსნის იგი მეორე ფრონტს აფხაზეთში, თუ მთელი ამ ოპერაციის მიზანს სამხრეთ ოსეთში სტატუს-კვოს აღდგენა წარმოადგენდა”.
“არაერთი მცდელობის მიუხედავად, ჯერჯერობით რუსული მხარისგან ვერც ერთი დამაკმაყოფილებელი პასუხი ვერ მივიღეთ” – დასძინა მან.
