სახელისუფლებო გუნდის მძიმე წონითი კატეგორიის ორი წევრის ღია დაპირისპირების შემდეგ რამდენიმე დღე გავიდა და ბუნებრივია, ამ ერთობ ჩვეულებრივ ინციდენტს არც დავუბრუნდებოდით, ”პრესა გე”-სთვის სანდო წყაროს სწორედ ამ დაპირისპირების შემდეგ განვითარებულ ბატალიებზე,რომ არ მოეწოდებინა ინფორმაცია.

წყაროს ინფორმაციით, კომიტეტის სხდომაზე სახელისუფლებო შტოს ორი წარმომადგენლის დაპირისპირების შემდეგ,რომელიც მასმედიის სხვადასხვა საშუალებებით ათასნაირად იქნა განხილული, სახელისუფლებო კულუარებში მითქმა-მოთქმის კიდევ ერთი კერა გაღვივდა. კულუარული ინფორმაციით, ომის შემდეგ მმართველ პარტიაში პოლიტიკური კრიზისი და ფარული გადაადგილებები დაიწყო და არ არის გამორიცხული, რომ უახლოეს მომავალში ქართულ პოლიტიკურ რუქაზე ძველი სახეებით დაკომპლექტებული ახალი პოლიტიკური პარტია ვიხილოთ.

ამ და კიდევ სხვა საინტერესო ინფორმაციის გადასამოწმებლად თავად ამ პერიპეტიების მოქმედ პირებს - ხათუნა გოგორიშვილს და კახა ბენდუქიძეს დავუკავშირდით.

ხათუნა გოგორიშვილი: ”ჩემი ხედვის დაფიქსირებას, ბენდუქიძესა და გოგორიშვილს შორის არსებულ დაპირისპირებას ვერ დავარქმევდი. ნებისმიერი თანამდებობის პირი, რომელიც საჯარო სამსახურში არასწორ პოლიტიკას გაატარებს, იგივე კრიტიკას გაიზიარებს. მიმაჩნია, რომ სახელმწიფოს სიძლიერეს საჯარო სამსახური ქმნის და ის ადამიანები, ვინც ამ სტრუქტურებში მუშაობენ, მათ მიმართ დამოკიდებულება უნდა იყოს ძალიან ფაქიზი. თუნდაც იმიტომ, რომ ეს არის სახელმწიფოს ხერხემალი.

პოლიტიკოსები მოდიან და მიდიან, მაგრამ ეს ადამიანები - რჩებიან. მე მგონი, დროა, რომ იმ ადამიანების ბედი რომლებიც საჯარო სამსახურში მუშაობენ, პოლიტიკურ ცვლილებებზე არ იყოს დამოკიდებული და მათი მუშაობა-არმუშაობის საკითხი გაუაზრებლად არ წყდებოდეს. ამიტომ, ნებისმიერი საჯარო სამსახურის რეორგანიზაცია და ნებისმიერი შტატების შემცირება ყოველთვის იქნება ჩემი პირადი ყურადღების ცენტრში”.

თქვენ იმ პოლიტიკოსთა რიცხვს მიეკუთვნებით, ვინც სტრუქტურულ ცვლილებებთან დაკავშირებით ყოველთვის სრულ ინფორმაცის ფლობს. როგორ მოხდა, რომ ბენდუქიძის რეფორმამ თქვენი გვერდის ავლით ჩაიარა?
- გეთანხმებით, მე ყოველთვის ვადევნებ თვალს ყველა დებულებას, რომელიც დასამტკიცებლად მზადდება და ვეცნობი მათ შინაარსს. მაგრამ, ამჯერად, ყველაფერი ისე უჩუმრად მოხდა, რომ მე მხოლოდ ბოლოს გავიგე და სიმართლე გითხრათ ძალიან გამიკვირდა, როდესაც შტატების შემცირების ამბავი შევიტყვე.

ანუ, თქვენ რაიმე სახის დაპირისპირებას ბატონ კახასთან გამორიცხავთ?
- მე დავუპირისპირდები ნებისმიერ ადამიანს, რომელიც სახელმწიფო სამსახურის რეფორმას არასწორი მიმართულებით დაიწყებს და სახელმწიფო ინტერესების საწინააღმდეგოდ იქნება მიმართული. არა აქვს მნიშვნელობა, რა გვარის იქნება ის ადამიანი.

როგორც ჩანს ბატონი კახა წმინდა ბიზნესის კუთხით მიუდგა საკითხს, როდესაც შტატების შემცირება დაიწყო…
- ჩემთვის ცნობილია მისი მისწრაფება და გამიგია, რომ ბატონი კახა ხელმძღვანელობდა დიდ საწარმოებს, სადაც ათობით ათასი ადამიანი მუშაობდა. როდესაც საქმე კერძო ბიზნესს და კერძო სტრუქტურებს ეხება, იქ შეიძლება ადამიანმა ნებისმიერი რეორგანიზაცია და რეფორმა განახორციელო, იმიტომ რომ იქ თუ რაიმე არასწორი შედეგი დადგა, პირადად ბიზნესმენის ბიუჯეტი ზარალდება. მაგრამ, როდესაც საკითხი სახელმწიფო ბიუჯეტს ეხება, სახელმწიფო ბიუჯეტთან მიმართებაში ექსპერიმენტების ჩატარება, რბილად რომ ვთქვათ, არასწორად მიმაჩნია.

მაშინ, როდესაც ქვეყანაში ომი იყო გაჩაღებული, კანცელარიიდან 89 თანამშრომელი გაანთავისუფლეს. კანცელარიას ცოტა რომ გაეჭირვებინა, ეს ხალხი სამსახურის გარეშე არ დარჩებოდა და ეს იმ ფონზე მოხდა, როცა 2008 წლის სახელმწიფო ბიუჯეტში ცვლილებების პროექტით სახელმწიფო კანცელარიის დაფინანსება მხოლოდ 300 ათასი ლარით შემცირდა. სამაგიეროდ, კანცელარიის მთარგმნელობითი ბიუროს შექმნისთვის უკვე დამტკიცებულ ბიუჯეტში მილიონი ლარი გამოიყო. სიმართლე გითხრათ ამ ბიუროს შექმნის აუცილებლობასაც სკეპტიკურად ვუყურებ.

გვაქვს ინფორმაცია, რომ კახა ბენდუქიძე განათლების სისტემით დაინტერესდა და ინსტიტიტების შესყიდვა დაიწყო…
- ამის შესახებ ვერაფერს გეთყვით, რადგან კახა ბენდუქიძის ბიზნეს-ინტერესები ჩემთვის უცნობია.

გავრცელდა ინფორმაცია, რომ საპროცედურო საკითხთა საპარლამენტო სხდომაზე ბენდუქიძის კრიტიკის გამო თქვენ პროკურატურაში დაგიბარეს…
- არ მესმის რაზე ლაპარაკობთ. რატომ უნდა დავებარებინე არ მესმის?
მე არავინ გამიკრიტიკებია. უფრო მეტიც, მე თქვი ის, რაც სწორად მიმაჩნდა და ამას არაერთხელ გავიმეორებ კიდევ. აქ პიროვნულ დაპირისპირებაზე კი არ არის საუბარი, არამედ სახელმწიფოებრივ აზროვნებაზე და დამოკიდებულებაზეა.

”პრესა.გე” კახა ბენდუქიძესაც ესაუბრა.

2008 წლის საპროცედურო საკითხთა საპარლამენტო სხდომაზე ხათუნა გოგორიშვილის მიერ თქვენს მიმართ არაერთი ბრალდება გაისმა…
- ჩემთვის უცნობია ეს ინფორმაცია და არ ვიცი რა ბრალდებებზეა საუბარი.

დავიწყოთ იმით, რომ პირველიდან თხუთმეტ აგვისტომდე, მაშინ, როდესაც ქვეყანაში საომარი მდგომარეობა იყო, თქვენ 89 თანამშრომელი გაათავისუფლეთ სამსახურიდან. რა აუცილებლობით იყო განპირობებული თქვენი გადაწყვეტილება?
- ეს ხალხი ნამდვილად გავათავისუფლე , რადგან ამდენი ადამიანის მუშაობა არ იყო საჭირო, ანუ სტრუქტურის ჩვეულებრივი ოპტიმიზაცია მოხდა. ამდენად, თქვენი აღშფოთება ჩემთვის გაუგებარია.

და ეს ოპტიმიზაცია მაინცდამაინც საომარ ვითარებაში გახდა აუცილებელი?
- ომი რა შუაშია? ეს გადაწყვეტილება გაცილებით ადრე, გაზაფხულზე იქნა მიღებული. რაც შეეხება ვადებს, მას ადგენს კანონი და არა ვინმე სხვა. ამდენად, რა ვადებშიც იქნა დადგენილი ოპტიმიზაციის ჩატარების საკითხი, სწორედ იმ ვადებში განხორციელდა კიდეც. რაც შეეხება ამ პროცესის დამთავრებას, ოპტიმიზაცია 15 აგვისტოზე გაცილებით გვიან დასრულდა.

თქვენ მაინც არ უპასუხეთ ჩემს შეკითხვას ხათუნა გოგორიშვილის მიერ წაყენებული ბრალდების თაობაზე…
- ამაზე თავად ქალბატონმა ხათუნამ გიპასუხოთ, მე ამ ბრალდებებს არ ვცნობ.

მას შემდეგ, რაც ქალბატონმა ხათუნამ კომიტეტის სხდომაზე თქვენს მიერ გატარებული პოლიტიკა დაგმო და ფაქტობრივად, საკუთარი გუნდის წევრი გააკრიტიკა, გავრცელდა ინფორმაცია, რომ ის პროკურატურაში დაიბარეს. თქვენ რას იტყვით ამის თაობაზე?
- მე ნამდვილად არ ვიცი, სად იყო ქალბატონი ხათუნა, ან სად დადის. ეს მას უნდა ჰკითხოთ.

ხომ არ მიგაჩნიათ, რომ გოგორიშვილის მხრიდან თქვენი კრიტიკა სამომავლოდ მის ასე ვთქვათ სხვა გუნდში გადასვლას ემსახურებოდა?
- ხათუნა გოგორიშვილი არის სახელისუფლებო გუნდის წევრი და ამდენად, ნაკლებად სავარაუდოდ მიმაჩნია მისი რომელიმე პარტიაში გადასვლა.

ყველაფრის მიუხედავად, თქვენ ერთი გუნდი ხართ?
(იცინის) დიახ, ნამდვილად.

და თქვენს შორის არანაირი დაპირისპირება არ არსებობს?
როგორ არა. ჩვენ ძალიან ბევრს ვკამათობთ. მთელ რიგ საკითხებზე და ამიტომ ვაღწევთ სასურველ შედეგებს.

გამომდინარე იქიდან, რომ თქვენ ბიზნესმენი ხართ და თქვენს სახელს არაერთი ობიექტის პრივატიზება უკავშირდება, გაჩნდა ინფორმაცია იმის თაობაზე, რომ თქვენ განათლების სისტემით დაინტერესდით და ინსტიტუტების შეძენით დაიწყეთ…
- რასაც თქვენ ამბობთ, ეს არის მტკნარი ტყუილი…

თქვენ იმიტომ დაგიკავშირდით, რომ ეს ინფორმაცია გადაგვემოწმებინა…
- ამ საკითხზე საუბარს არ ვაპირებ…

P.S.მიუხედავად იმისა, რომ ჩვენმა რესპოდენტებმა მათზე გავრცელებული ინფორმაცია უარყვეს, რჩება ეჭვი იმისა, რომ ეს ვარაუდები საფუძველს მოკლებული მაინც არ არის.

ხელისუფლებას კახა ბენდუქიძის მიერ სახელმწიფოსთვის სასარგებლოდ გაკეთებული საქმეების განხილვა რომ ჰქონდეს განზრახული, ვერაფერს აღმოაჩენდა ისეთს, რომ ამ კაცის მთავრობაში ყოფნა უღირდეს.

მთავრობის დაკომპლექტებისას მთავრობის გუნდიდან ბენდუქიძის გამოყვანა თითქმის იმ ჟესტად უნდა აღქმულიყო, რომ მას მთავრობასთან შეხება აღარ ექნებოდა, მაგრამ, კანცელარიაში დანიშვნისთანავე მან კანცელარიაის ფუნქციები გაუზარდა და დღს, ფაქტობრივად, მთელ მთავრობას, პრემიერ მინისტრის ჩათვლით, აკონტროლებს.