სეპარატისტული ხელისუფლება საქართველოსთან ე.წ. საზღვრის ჩაკეტვას აპირებს. განსაკუთრებული შეზღუდვა მშვიდობიან მოსახლეობას ეხება. სააგენტო ”ინტერფაქსისთვის” მიცემულ ინტერვიუში ედუარ კოკოითი ამბობს, რომ ეს ზომა მან სწორედ მოქალაქეების დასაცავად მიიღო.

''სამხრეთ ოსეთის ტერიტორიაზე ბოლო დროს მომხადრი ტერაქტები გვაიძულებს, საქართველოსთან საზღვარზე კონტროლი გავამკაცროთ'', - განაცხადა კოკოითმა.

თბილისში მიაჩნიათ, რომ კოკოითი ამჯერადაც მოსკოვის კარნახით მოქმედებს. საზღვრის ჩაკეტვით ოკუპანტები შეეცდებიან კონფლიქტურ ზონებზე კონტროლი შეინარჩუნონ.

”რუსებს უნდათ, რომ კოტროლი ჰქონდეთ ამ ტერიტორიაზე, გააჭიანურონ დრო და არ გავიდნენ ამ ტერიტორიებიდან, სწორედ ამიტომ ხდება ტერაქტები ამ ზონაში. არანაირი საზღვარი არ არსებობს, ადმინისტრაციული საზღვრის გადაკვეთის უფლება კი აქვს საქართველოს ყველა მოქალაქეს,'' - აცხადებს ტერიტორიული მთლიანობის აღდგენის დროებითი საპარლამენტო კომისიის თავმჯდომარე შოთა მალაშხია.