ოპოზიციის მიერ 7 ნოემბრისთვის დაგეგმილ საპროტესტო ღონისძიებებში გაერთიანებული ოპოზიციის წევრი, ყოფილი სახელმწიფო მინისტრი გოგა ხაინდრავაც გეგმავს მონაწილეობას.

“მე ყოველთვის ვიქნებით იქ, სადაც ქართული საზოგადოება იქნება. არ ვიცი, რა შეიძლება, მოხდეს 7 ნოემბერს, მაგრამ ვიცი, რა აღარ შეიძლება, გაგრძელდეს: აღარ შეიძლება, გაგრძელდეს სააკაშვილის რეჟიმი საქართველოში, - ეს არის უბედურება ჩვენი ქვეყნისთვის” – აცხადებს საფრანგეთში მყოფი ხაინდრავა. 

ყოფილი სახელმწიფო მინისტრი თავს “ეროვნული საბჭოს” იმ ნაწილის წევრად თვლის, რომელმაც “დღემდე ერთობა შეინარჩუნა” და აცხადებს, რომ არ გაუწყვეტია მეგობრობა და თანამშრომლობა კოკა გუნცაძესთან, კახა კუკავასთან, კობა დავითაშვილთან და “ეროვნულ ფორუმთან”. 

“თავის დროზე ვთქვი, რომ “ეროვნული საბჭო” ვირტუალურია და ფაქტობრივად დაიშალა... ეს იმიტომ განვაცხადე, რომ იმ მომენტში მთელმა პოლიტიკურმა სპექტრმა მორატორიუმი გამოაცხადა. როდესაც პოლიტიკოსები შეფასებას არ აძლევენ არსებულ ვითარებას, მაშინ პოლიტიკურ გაერთიანებებზე საუბარიც ზედმეტია. მე არ გამიწყვეტია მეგობრობა და თანამშრომლობა კოკა გუნცაძესთან, კახა კუკავასთან, კობა დავითაშვილთან, “ეროვნულ ფორუმთან”... ვფიქრობ, ჩვენ ერთობის წევრები ვართ იგივე “მემარჯვენეებთან” – აცხადებს გოგა ხაინდრავა.

როგორც ცნობილია, გაერთიანებული ოპოზიცია 7 ნოემბრისთვის საგანგებოდ ემზადება და გასული წლის ნოემბრის მოვლენების გრანდიოზული გამოსვლებით აღნიშნვას გეგმავს.