“წარმატების მისაღწევად საჭიროა, რომ ამ მოლაპარაკებებში ჩაერთოს ყველა მხარე და ასევე პატივი ეცეს ყველა მხარის პოზიციას,” - იტყობინება AFP სარკოზის სიტყვებზე დაყრდნობით. საფრანგეთის პრეზიდენტმა ეს განცხადება ევიანის საერთაშორისო კონფერენციაზე გააკეთა თავის რუს კოლეგასთან დიმიტრი მედვედევთან შეხვედრის წინ.

რუსეთი დაჟინებით მოითხოვს აფხაზეთის და სამხრეთ ოსეთის წარმომადგენლების მონაწილეობას ჟენევის მოლაპარაკებებში, რასაც თბილისი ეწინააღმდეგება.

AFP-ი ასევე იტყობინება უცნობი ევროპელი დიპლომატის სიტყვებზე დაყრდნობით, რომ ევროკავშირის სპეციალური წარმომადგენელი საქართველოს კრიზისის საკითხებში, პიერ მორელი მუშაობს იმაზე, თუ რა გზით შეიძლება ჩაერთვნენ ორი თვითგამოცხადებული რეგიონის წარმომადგენლები მოლაპარაკებებში.

“ჩვენ კარგად ვიცით, რომ ეს უფრო მეტია, ვიდრე უბრალო დეტალი,” - განაცხადა მან, თან იქვე დასძინა, რომ არსებობს გზები იმისათვის, რომ “ისინი იქ იყვნენ, კონკრეტულად მაგიდასთან ჯდომის გარეშე”.