შიდა ქართლის სამხარეო ადმინისტრაციის ცნობით, “კარვების ქალაქიდან” და კომპაქტური ჩასახლების ადგილებიდან დევნილების გორის რაიონის სოფლებში დაბრუნება ხელისუფლების მიერ გამოყოფილი ტრანსპორტით ეტაპობრივად ხდება.

დევნილების დაბრუნება თბილისიდანაც მოხდება და ეს პროცესი რამდენიმე დღეში დასრულდება. ქართულ სოფლებში გუშინ დილიდან ზარალის დამთვლელი სპეციალური ჯგუფები შევიდა. აღნიშნული ჯგუფები სამართალდამცავების და ადგილობრივი ხელისუფლების წარმომადგენლებისგანაა დაკომპლექტებული. ზარალის ზუსტი ოდენობის დადგენისთანავე ოპერატიულად დაიწყება აღდგენითი სამუშაოები.

ამის პარალელურად ქართულ სოფლებში უკვე დაწყებულია განაღმვითი სამუშაოები. პროცესის სწრაფად დასრულების მიზნით ადგილობრივმა ხელისუფლებამ თავდაცვის სამინისტროს სთხოვა გამნაღმველთა დამატებითი ჯგუფების გაგზავნა.

შიდა ქართლის გუბერნატორი ლადო ვარძელაშვილი გორის რაიონის ყველაზე მეტად დაზრალებულ სოფლებში კარალეთში, ტყვიავში, ერგნეთსა და ნიქოზში ჩავიდა და ადგილზე ნახა არსებული ვითარება. გუბერნატორი მოსახლეობასაც შეხვდა და მათი პრობლემები მოისმინა.

“2 დღეში მოხდება ზარალის ზუსტი ოდენობის დადგენა, რის შემდეგაც დაიწყება დაზიანებული სახლების აღდგენითი სამუშაოები, რაშიც ადგილობრივი მოსახლეობა იქნება ჩართული. ყველა ოჯახს აუნაზღაურდება დანაკარგი”, განაცხადა ლადო ვარძელაშვილმა.

გუბერნატორმა ნიქოზის საკათედრო ტაძარიც მოინახულა, რომელიც რუსული აგრესიის შედეგად დაზიანდა. ყველაზე მეტად დანგრეულია მეუფის რეზიდენცია, სადაც 32 ჭურვია ჩამოვარდნილი. ვარძელაშვილი ნიქოზისა და ცხინვალის ეპარქიის მთავარეპისკოპოსს მეუფე ისაიას დახმარებას დაჰპირდა.

აღნიშნულის მიუხედავად, 10 ოქტომბრისთვის შიდა ქართლის გარკვეული ტერიტორიები კვლავ ოკუპირებული რჩება.

დიდი და პატარა ლიახვის, ფრონეს ხეობებს ისევ ოსი სეპარატისტები და რუსული საოკუპაციო ჯარები აკონტროლებენ.

დიდი ლიახვის ხეობის ცხრა ქართული სოფელში, პატარა ლიახვის ხეობის ოთხ სოფელში და ფრონეს ხეობის რამდენიმე სოფელში ვერც ერთი ქართველი შესვლას ვერ ახერხებს.

აღნიშნული ტერიტორიების დატოვებაზე რუსული მხარე არანაირ კომენტარს არ აკეთებს.