გუშინ ვაშინგტონში საქართველოს საელჩოში რამდენიმე საათით განგაში ატყდა. საელჩო პარალიზებული იყო, რადგან შენობაში კონვერტი მიიტანეს წარწერით “საქართველო, აფხაზეთი და სამხრეთ ოსეთი”, რომელშიც თეთრი ფერის ფხვნილი აღმოაჩინეს.
საელჩოს წარმომადგენლებმა აშშ-ის ფედერალური ბიუროს ექსპერტები გამოიძახეს. გამოძიების შედეგად დადგინდა, რომ აღნიშნული ნივთიერება სარეცხის უვნებელი ფხვნილი იყო.
ფედერალური ბიუროს თანამშრომლებმა განგაში შეწყვიტეს და საელჩოს თანამშრომლები ისევ შენობაში შეუშვეს.
აღსანიშნავია, რომ ბოლო ერთი წლის განმანვლობაში კონვერტები “თეთრი ფხვნილით” არაერთხელ მიუვიდათ საელჩოებს, ცნობილ პოლიტიკოსებსა თუ სპორტსმენებს. თითქმის ყველა შემთხვევაში, ფხვნილი უვნებელი აღმოჩნდა და წერილები მხოლოდ დაშინების მიზანს ემსახურებოდა.
პანიკა “თეთრი ფხვნილის” გამო 2001 წლის 11 სექტემბრის მოვლენების შემდეგ დაიწყო, როდესაც ამერიკის რამდენიმე სახელმწიფო დაწესებულებაში გაგზავნილ კონვერტებში საშიში ფხვნილი აღმოაჩინეს, რომელიც “ციმბირული წყლულის” ბაცილებს შეიცავდა.
| 