მატჩის პირველი ნახევარი ქართველთა ტერიტორიული უპირატესობით მიმდინარეობდა, მასპინძლებს გოლის გატანის სამი რეალური მომენტი ჰქონდათ, მაგრამ შაშიაშვილის თავური დარტყმის შედეგად, ბურთი მცირე მანძილით ასცდა მიზანს. შემდეგ, სტუმართა მეკარესთან პირისპირ დარჩენილმა რაზმაძემ ვერ იყოჩაღა და ბულგარელი გოლკიპერი ბურთს იოლად დაეუფლა; ერთ-ერთ სათამაშო ეპიზოდში კი კობიაშვილს ოდნავ სიზუსტე დააკლდა, ხოლო თავის მხრივ ტაიმის მიწურულს ბერბატოვმა ანგარიშის გახსნის კარგი შანსი გაუშვა.

მატჩის პირველ ტაიმში, მძიმე ტრავმა მიიღო მასპინძელთა ფორვარდმა ლევან მჭედლიძემ, რომელიც ერთ-ერთ სათამაშო ეპიზოდში მეტოქის მცველს საჰაერო დუელისას შეეჯახა, თუმცა თამაშის გაგრძელება მაინც შეძლო, მაგრამ ათიოდე წუთში შეცვლა მოითხოვა. მას ექიმებმა ტვინის შერყევა დაუდგინეს. იგი მოედნიდან საკაცით გაიყვანეს და რეანიმობილით საავადმყოფოში წაიყვანეს.

“ჯვაროსნებს” უპირატესობა არც მეორე ნახევარში დაუთმიათ, მაგრამ საგოლე მომენტების შექმნისას აშკარად სიზუსტე აკლდათ, ხშირ შემთხვევაში კი სტუმართა გოლკიპერი მოწოდების სიმაღლეზე იდგა.

საბოლოოდ, ქართველმა ფეხბურთელებმა 2010 წლის მუნდიალის მიმდინარე შესარჩევ ციკლში კიდევ ერთი ქულა ჩაიწერეს.

2010 წლის მსოფლიოს ჩემპიონატის შესარჩევი ციკლი. VIII ჯგუფი.
15 ოქტომბერი. თბილისი, ბორის პაიჭაძის სახელობის ეროვნულ სტადიონი.

საქართველო - ბულგარეთი 0:0

მსაჯი: ბიორნ კუიპერსი (ჰოლანდია).

საქართველო: ლომაია, ლობჟანიძე, სალუქვაძე, კვახაძე, შაშიაშვილი, რაზმაძე, მენთეშაშვილი, კობიაშვილი - კაპიტანი, გოცირიძე (ოდიკაძე, 84), იაშვილი (მერებაშვილი, 71), მჭედლიძე (სირაძე, 30).

ბულგარეთი: პეტკოვი, ტუნჩევი, ილიევი, მილანოვი, იანკოვი, ბერბატოვი - კაპიტანი, პეტროვი, გეორგიევი, დიმიტროვი (რანგელოვი, 73), პეტროვი (პოპოვი, 29), ივანოვი.
გოლები:

გააფრთხილეს: პეტროვი, რაზმაძე, ტუნჩევი, შაშიაშვილი