| დენიელ ფრიდი საქართველოში ვიზიტს დღეს საპარლამენტო ოპოზიციასთან შეხვედრით განაგრძობს.
საპარლამენტო უმცირესობამ აშშ-ს სახელმწიფო მდივნის მოადგილე დენიელ ფრიდთან დღეს გამართულ შეხვედრისას სხვადასხვა საკითხებთან ერთად, რუსეთ-საქართველოს ურთიერთობებზე გაამახვილა ყურადღება.
როგორც შეხვედრის დასრულების შემდეგ საპარლამენტო უმცირესობის ლიდერმა გიორგი თარგამაძემ განაცხადა, შეხვედრაზე ისაუბრეს, რომ საქართველო არ უნდა წამოეგოს რუსეთის პროვოკაციას და ქვეყანამ თანმიმდევრული დემოკრატიული რეფორმები უნდა გაატაროს.
მისი თქმით, სწორედ ამ მიზნების განსახორციელებელი გზებისა და იდეების გარშემო გაცვალეს მოსაზრებები.
“დიდი კმაყოფილებით შემიძლია გამოვთქვა ჩემი მოსაზრება, რომ “ქრისტიან-დემოკრატების” მიდგომები ქვეყანაში არსებული პრობლემებისადმი ტერიტორიული მთლიანობის აღდგენის, ეკონომიკური განვითარების, უმუშევრობის, სოციალური პრობლემების, დემოკრატიის განვითარების, მთლიანად ემთხვევა იმ გენერალურ ხაზს, რომელიც ჩვენს მეგობარ ქვეყნებს, დემოკრატიულ სახელმწიფოებს აქვთ გამოხატული საქართველოს მიმართ”, - განაცხადა თარგამაძემ და დასძინა, რომ ახლა მნიშვნელოვანია ამ გზაზე კონსტიტუციურ ჩარჩოებში, თანმიმდევრულად, მშვიდობიანად სიარული და ქვეყნის სწორედ ასეთი გზით შეცვლა უკეთესობისკენ.
ამასთან, აშშ-ს სახელმწიფო მდივნის მოადგილე დენიელ ფრიდი საპარლამენტო ოპოზიციასთან შეხვდერისას აგვისტოს მოვლენების შემსწავლელი დროებით კომისიით დაინტერესდა.
როგორც შეხვედრის შემდეგ ჟურნალისტებს კომისიის ხელმძღვანელმა პაატა დავითაიამ განუცხადა, დენიელ ფრიდი დაინტერესდა კომისიის შექმნის მიზნებით და ოპოზიციონერ დეპუტატებს “გაბედული შეკითხვების დასმის” რეკომენდაცია მისცა.
შეხვედრისას კი, საუბრის ძირითადი თემა ქვეყნის ტერიტორიული მთლიანობა და ქართულ-რუსული ურთიერთობები იყო.
დენიელ ფრიდი საქართველოს დღეს დატოვებს, მანამდე კი თბილისის საერთაშორისო აეროპორტში პრესკონფერენციას გამართავს.
| 