საქართველოს ლეიბორისტული პარტიის" ლიდერი შალვა ნათელაშვილი ქვეყნის ტერიტორიული მთლიანობის პრობლემისა და კონფლიქტების მოგვარებას, კოსოვოს, როგორც დამოუკიდებელი ქვეყნის, გაუქმებას უკავშირებს.
დღევანდელ ბრიფინგზე შალვა ნათელაშვილმა აშშ-ს მთავრობას მოუწოდა, გააბათილოს კოსოვოს აღიარების თაობაზე მიღებული გადაწყვეტილება, ხოლო რუსეთის პრეზიდენტმა გააუქმოს ე.წ. სამხრეთ ოსეთისა და აფხაზეთის დამოუკიდებელ სახელმწიფოებად ცნობის ბრძანება, რაც საქართველოსაც გადაარჩენს და მსოფლიოს ომს აარიდებს.
მისი აზრით, უკიდურეს შემთხვევაში ტერიტორიული გადანაწილების საბაბით დედამიწაზე ომის ახალი კერები გაჩნდება.
"მოვუწოდებ ამერიკის შეერთებულ შტატებს, გააუქმოს კოსოვოს თაობაზე მიღებული გადაწყვეტილება, რუსეთის პრეზიდენტმა კი - განკარგულება აფხაზეთსა და სამხრეთ ოსეთის სეპარატისტული ქვეყნების შექმნის შესახებ", - განაცხადა შალვა ნათელაშვილმა.
ნათელაშვილის დღევანდელ ბრიფინგს ევროკომისიის წარმომადგენელი საქართველოში პერ ეკლუნდიც ესწრებოდა. ბრიფინგის დასასრულს ეკლუნდმა ჟურნალისტებთან მხოლოდ ის აღნიშნა, რომ შალვა ნათელაშვილის მოსაზრებას მსოფლიოში კონფლიქტების მოგვარებასთან დაკავშირებით ვერ დაეთანხმება.
ამასთან, "ლეიბორისტული პარტია" "ცოცხალ ჯაჭვში" მონაწილეობას არ აპირებს. ნათელაშვილის განცხადებით, მას არ სჭირდება დღეს "ცოცხალ ჯაჭვში" ჩაბმა, რადგან ყოველთვის ქვეყნის და ხალხის საკეთილდღეოდ "ცოცხალ ჯაჭვშია" ჩაბმული.
|