ნატო-მ საქართველოს საჰაერო სივრცის გაკონტროლება დაიწყო
11:13
საქართველოს საჰაერო სივრცის კონტროლის სისტემა ნატო-ს ანალოგიურ სისტემას შეუერთდა, რაც ალიანსს საშუალებას მისცემს ქართული რადარებიდან ინფორმაცია მიიღოს, _ იუწყება “იტარ-ტასი” ბრიუსელიდან. ნატო-ს პრესმდივანმა, ჯეიმს აპატურაიმ აღნიშნა, რომ საჰაერო კონტროლის ქართული სისტემა “მნიშვნელოვანწილად განადგურებულია” და საჭირო იქნება დრო, რათა დაკმაყოფილდეს თბილისის თხოვნა, რადარების აღდგენაში დახმარების თაობაზე. ნატო-ს საჰაერო მიმოსვლის მონაცემების გაცვლის პროგრამასთან საქართველოს მიერთების გადაწყვეტილება ჯერ კიდევ 2008 წლის მარტში მიიღეს. თბილისი აცხადებს, რომ კონტროლის თანამედროვე მეთოდების გამოყენებით შესაძლებელი გახდება საჰაერო სივრცის დარღვევის ფაქტების ზუსტი დადგენა. ადრე ქართული მხარე არაერთხელ ადანაშაულებდა რუსეთის საჰაერო სამხედრო ძალებს საქართველოს საჰაერო სივრცის დარღვევაში, თუმცა ამას ვერ ამტკიცებდა. ამჟამად, საჰაერო სივრცის კონტროლის სისტემას ნატო-ს ქვეყნები და ავსტრია იყენებს. გარდა ამისა, შეთანხმებას სისტემაში მონაწილეობის შესახებ ხელი მოაწერეს ფინეთმა, უკრაინამ და ალბანეთმა.
