პოლიტოლოგი ნიკოლოზ ჩიტაძე არ გამორიცხავს, რომ აფხაზეთისა და ცხინვალის სეპარატისტული ხელისუფლებების მეთაურები ბაღაფში და კოკოითი საქართველოს მთავრობამ ინტერპოლის ძებნილებად გამოაცხადოს და რუსეთის ფარგლებს გარეთ მათი გადაადგილების შეზღუდვა მოითხოვოს.
როგორც მედიანიუსს ნიკოლოზ ჩიტაძემ განუცხადა, როგორც ინტერპოლის წევრს, ქართულ მხარეს სრული უფლება აქვს სახელმწიფოს ღალატისა და უკანონო შეიარაღებული ფორმირებების შექმნის ბრალდებით სეპარატისტული რეჟიმების მეთაურების წინააღმდეგ სისხლის სამართლის საქმე აღძრას.
მისი თქმით, ქართულმა მხარემ კოკოითი და ბაღაფში ცხინვალის მოვლენებამდე სისხლის სამართლის დამნაშავეებად თუ არ გამოაცხადა, მხოლოდ იმის გამო, რომ ამ რეჟიმებთან მშვიდობიანი მოლაპარაკებების წარმოების პერსპექტივა განიხილებოდა.
ცხინვალისა და აფხაზეთის დე-ფაქტო ხელისუფლებები ძალიან მალე მიხვდებიან რეალურად რუსეთი რას წარმოადგენს, -აცხადებს ქართველი ექსპერტი.
