საქართველოს პირველი ლედი სანდრა რულოვსი დღეს მარნეულის რაიონს სტუმრობდა. სანდრა რულოვსმა სოფელ მოლაოღლში ახალი საჯარო სკოლა გახსნა.

სკოლის გახსნას საქართველოში აზერბაიჯანის ელჩი ნამიკ ალიევი, ქვემო ქართლის გუბერნატორი დავით კირკიტაძე, განათლებისა და მეცნიერების მინისტრის მოადგილე ალექსანდრე ჩიკვაიძე ესწრებოდნენ.

პირველმა ლედიმ მოსწავლეებს სასწავლო პროცესის დაწყება მიულოცა და 11 პირველკლასელს პრეზიდენტის საჩუქარი -ჩანთები, წიგნები და სასკოლო ფორმები გადასცა.

დღემდე სოფელის მოსწავლეებს 1938 წელს აშენებულ, სრულიად ამორტიზებულ ხის შენობაში უხდებოდათ სწავლა. ახალი სკოლა მეგაპროგრამა "იაკობ გოგებაშვილის" ფარგლებში ორ თვეში აშენდა. სკოლის ასაშენებლად ნახევარი მილიონი ლარი დაიხარჯა.

დღესვე განათლებისა და მეცნიერების მინისტრის მოადგილემ ალექსანდრე ჩიკვაიძემ და ქვემო ქართლის გუბერნატორმა დავით კირკიტაძემ ქალაქ ბოლნისში ნომერ 3 საჯაროს კოლა გახსნეს. აღნიშნული სკოლაც პროგრამა "იაკობ გოგებაშვილის" პროექტის ფარგლებში გარემონტდა. სამუშაოებისთვის 106 ათასი ლარი დაიხარჯა.