ბელორუსიის პრეზიდენტი ალექსანდრე ლუკაშენკო აფხაზეთისა და ე.წ. სამხრეთ ოსეთის დამოუკიდებლობის საკითხის გადაწყვეტაში აჩქარებას არ აპირებს.
“რამდენადაც საკითხი მწვავედ დგას - მან მოიტანა შეტაკება, თითქმის ცივი ომი, მე არ მინდა, ავჩქარდე და ერთმნიშვნელოვნად რამე გადავწყვიტო”, - განაცხადა ლუკაშენკომ დასავლეთის საინფორმაციო საშუალებებისთვის მიცემულ ინტერვიუში, რომელიც ბელორუსიის ტელევიზიით გადაიცა.
ბელორუსიის პრეზიდენტის თქმით, ე.წ. სამხრეთ ოსეთისა და აფხაზეთის დამოუკიდებლობის აღიარების საკითხი შესაძლოა, ახალი მოწვევის პარლამენტმა განიხილოს.
ლუკაშენკოს ვარაუდით, “ახალ დეპუტატებს შესაძლოა, ჰქონდეთ სხვა არგუმენტები და ფაქტები, რომლებიც მან არ იცის”.
ამასთან, მან აღნიშნა, რომ აფხაზეთისა და ე.წ სამხრეთ ოსეთის დამოუკიდებლობის აღიარების საკითხი არ შეიძლება, განიხილებოდეს, როგორც რუსეთის მხარდაჭერის ფაქტორი. “უფრო მეტად ეს არის ჩვენი ურთიერთობები – ბელორუსიისა აფხაზეთთან და სამხრეთ ოსეთთან”, - განაცხადა ლუკაშენკომ და დასძინა, რომ “რომ არა კოსოვო, არც სამხრეთ ოსეთი და აფხაზეთი იქნებოდა”.
“ევროპას და ამერიკას ამ საკითხთან დაკავშირებით ჰქონდათ აზრთა სხვაობა, თუმცა მოქმედებდნენ შეთანხმებულად და ამჟამინდელ რუსეთზე გაცილებით ძლიერები აღმოჩნდნენ, თუმცა არ არსებობს არანაირი გარანტია იმისა, რომ რუსეთის მზარდი ზეგავლენა პოსტსაბჭოთა ქვეყნებში უახლოეს მომავალში სიტუაციას სხვა მიმართულებით არ შეცვლის” – დასძინა მან.
| 