“ბოლო პერიოდში განვითარებული მოვლენების შემდეგ მდგომარეობა კიდევ უფრო დაიძაბა და არა მარტო “ენგურჰესი” და “ვარდნილჰესების კასკადი”, თვითონ “ენგურჰესის კაშხალიც” ოკუპირებულია, რის გამოც იქ დასაქმებულნი, რომელთაAუმრავლესობა საქართველოს ენერგეტიკის მუშაკთა პროფკავშირის წევრია, გაუსაძლის მდგომარეობაში აღმოჩდა”, – განაცხადა დღეს გამართულ კონფერენციაზე საქართველოს პროფკავშირული გაერთიანების თავმჯდომარემ ირაკლი პეტრიაშვილმა.

მისივე თქმით, რუსი ოკუპანტები დასაქმებულებს აიძულებენ, მიიღონ რუსული პასპორტები სამუშაოს შენარჩუნების სანაცვლოდ, რადგან ფორმა #9, რომელიც აქამდე მოქმედებდა, უვარგისია. 

“ისინი მუშებს ამცირებენ და შეურაცხყოფას აყენებენ მხოლოდ იმის გამო, რომ ეთნიკური ქართველები არიან. გაუსაძლისი მდგომარეობაა საკვებით მომარაგებასთან დაკავშირებითაც, რადგან ისინი საშუალებას არ აძლევენ მუშებს და ადგილობრივ მოსახლეობას, საკვები პროდუქტები ზუგდიდის ტერიტორიიდან შეიტანონ” – აღნიშნა პეტრიაშვილმა.

საქართველოს პროფკავშირული გაერთიანება მიმართავს საერთაშორისო პროფკავშირულ ორგანიზაციებს, დაგმონ მშრომელთა ეთნიკური ნიშნით დევნის ფაქტი და გამოიყენონ მათ ხელთ არსებული ყველა საშუალება ამ ადამიანების დასაცავად, ასევე მოუწოდებს რუსეთის პროფკავშირებს, გამოიჩინოს პროფკავშირული სოლიდარობა და მიმართოს საკუთარ ხელისუფლებას მსგავსი ქმედებების აღსაკვეთად.

ამასთანავე პროფკავშირები მიმართავენ საქართველოს მთავრობას, ეკონომიკის სამინისტროს, სადაზღვევო კომპანიებს, ოკუპირებულ ტერიტორიებზე დასაქმებულთა ჯანმრთელობის შეღავათიან პირობებში დაზღვევის მიზნით დამოიყენონ თანხა ამ საწარმოთა მოგების წილიდან.