ლავროვს შეუძლია ელოდოს, როდის იტყვის უარს აშშ საქართველოს ნატო-ში გაწევრიანებაზე

საქართველოს პარლამენტის თავმჯდომარე, დავით ბაქრაძე რუსეთის საგარეო საქმეთა მინისტრის, სერგეი ლავროვის იმ განცხადების დაჯერებას არ აპირებს, რომლის თანახმადაც, აშშ საქართველოს ნატო-ში გაწევრიანებს მხარს არ დაუჭერს. 

როგორც სერგეი ლავროვმა პრესკონფერენციაზე განაცხადა, აშშ მისი პარტნიორი ქვეყნისათვის ამგვარ მხარდაჭერაზე სწორედ, აფხაზეთსა და სამხრეთ ოსეთში ომის დაწყების გამო იტყვის უარს. ლავროვის თქმით, ამის შესახებ ჯერ კიდევ საომარი მოქმედებების დაწყებამდე ერთ-ერთი ამერიკელი მაღალჩინოსანი აკეთებდა განცხადებას.

„არ ვაპირებ დავიჯერო და კომენტარი გავუკეთო ასეთი ტიპის განცხადებებს. არ მგონია, რომ აშშ-ს ოდესმე სადმე გამოეხატოს პოზიცია იმაზე, რომ რუსეთის სამხედრო აგრესიისა და მის მიერ საქართველოს დაპყრობის შემდეგ, აშშ საქართველოს ნატო-ში გაწევრიანებაზე უარს იტყვის. ამ სახელმწიფოს ყველა რანგის თანამდებობის პირები სწორედ რუსეთის აგრესიის შემდეგ აცხადებდნენ მკაფიოდ და საჯაროდ, რომ ნატო-ში საქართველოს გაწევრიანება დღეს უფრო პრიორიტეტული ამოცანაა, ვიდრე ეს რუსეთის აგრესიამდე იყო“, - აღნიშნა ჟურნალისტებთან საუბრისას დავით ბაქრაძემ. 

მისივე თქმით, სერგეი ლავროვს შეუძლია ელოდოს, როდის იტყვის უარს  აშშ ნატო-ში გაწევრიანების პროცესში საქართველოს მხარდაჭერაზე. თუმცაღა, ეს ლოდინი ძალიან ხანგრძლივი იქნება.